(أمي)
لسه الليل ماهوش عارف ينام
من غير مايتمطع على حضنك.....
و هو متعلق على شباك
ما بين أوضتي و بين أوضتك......
و هو لسه عيال الحارة مشغولة
على سيرتك ما أنا سيرتك و أنا سرك.....
و أنا آخر دموع باتت على كفك
و منحوت على وشك تفاصيلي...
أنا طيبتك و بعشق نومتي في حجرك
على كتفك و حافظ لسه حواديتك
و بحكيها لأحفادك......
ما أنا خلفت يامه ثلاث قمرات
ما بينهم راجل
و الكبيرة بتعتي سميتها على اسمك
تفاصيلها تقاطعها و طيبتها
كأنك لسه يا أمي ماغبتيشي.....
سنين مرت على بعدك
و أنا قلبي ما طاب بعدك....
مانكرتش بأني قبلت أكون وحداني
وأكمل و أنت جوايا....
ما هو أنت قبل ما تمشي
ما قولتيشي بإنك ماشية مش راجعة.....
لا ودعتك و لا سمعتك
أنا فاكر شوية و تيجي تتوضي
آذان العصر كان لسه بيندهلك
و أنا يامه على المدنة
بقول يا مه على مهلك......
و عدى العصر و المغرب
و أنا على المدنة مستغرب
بإن الشمس مش راضية تعشش جوه شباكي.....
أتاريكي سفرتي هناك
و أنا واقف و متحير و متغير
فضلت كتير لا أنا عارف
اسح دموع على بعدك
و لا عارف أعيش بعدك......
و حاسس إنى غريب يامه ما بين أغراب
و قلبي كأنه حجارة متحجر
و عايش يومي متوتر......
ساعات أسمع بكى مبحوح على صدري
كأنه صراخ و متبعثر على روحي
مرارة حلقي مش راضية
تفارق يوم ما سبتيني
و أنا مستني صلاة الفجر
بدلع على سريري......
عشان اسمع صدى صوتك
و في الضلمة تغنيلي
تضميني على حضنك
و أشوف فى عنيك لون الصبح
بتزغرط عصافيره........
و صوت رفعت محسسني
بأن الجنة مفتحها رضا روحك.....
و إن قالوا غيابك صار من الماضي
أنا لسه برغم الشيبة مش قادر
أشوف نفسي سوى عيل
بيتدلع على أمه و هو كبير......
آه ياما أنا نسيت أحكيلك على زوجتي
على فكره بتشبهني و تشبهلك أوي ياما
و في طبعها وخده كتير منك.....
وطعم طبيخها أه يامه كأنك لسه طبخالي
وأطيب من طيابتها ما شفت اتنين
و عشقاني و حباني و ضماني
ما بين الحب و الغيره كأنى أمير......
بترضيني و صبرانه على طبعي
ما هي طبعي و واخده طبعي و وضعي
ما هي روحي وعشرتها دوى روحي
و من غيرها تروح روحي........
وحيد على الجمال 21/3/2021
سرس الليان محافظة المنوفية
ليست هناك تعليقات:
إرسال تعليق