ةةةةة
الدنيا ورق كوتشينه ..
مسكينه ومش مسكينه
تغازلنا ..وتعرينا ..
تقهرنا ..وتغطينا
تسامرنا ..وتلعب بينا
تسقينا تعاند ..فينا ..
ماهى دنيا ..
ورق كوتشينه ........!!
ترمينا ساعات ..للحسره
تفتح شباكنا لبكره ..
ف بحور الليل ..والقمره
و شوش الخلق العكره !
تهنينا ببصره ..سمينه
ماهى دنيا ...
ورق ..كوتشينه .......!!
تضحكلى..ساعات تشاور لى
تلبس لى الطرحه ..التلى
تغمز برموشها ..تخلى !
العشره ..تحب البلى
والشايب يسوى ..مدينه !
ما هى دنيا ..
ورق ..كوتشينه .........!،!
تناديها ..تميل على كفك
لو تحرن يوم ..ها تزقّك
تتنيك ياجميل ..وتفكك !
تشوبش يابا .. تزفك
ماهى دنيا ..بنت لزينه
والدنيا ...
ورق ..كوتشينه ........!!
التسعه ..تدفى السقعه
بالحبسه تدارى الرّقعه ..
والبنت بتكتب ..رقعه
حجاب الدوه ..والسبعه
بس انت تفوق م الوقعه
وترجع تانى ..لينا !
ماهى دنيا ..
ورق ..كوتشينه ....!!
العيل ..آه لو ..مال
راح يسرق كل ..حلال
ويطبل ..للبطال
ف جماعه ماشيه شمال ..
ويشوه ..ايها مينا
والدنيا ...
ورق ..كوتشينه .....!!
صاحبها ..يابا وفنّط
مش ممكن يوم تتظبط
تنساك على طول تتنطط
تسرح بك ياما ..وتشفط
البنك وكل ..خزينه ...
الدنيا ....
ورق .. كوتشينه .....!!
ياللى بتلعن ..حظ أبوك
حظرتك واللى جابوك ..
ياما هزت عرش ..ملوك
الدنيا فنون وسلوك ..
ساعه تضحك وساعه حزينه ..
الدنيا ...
ورق ..كوتشينه......!!
فيها الشايب ..يتبسم
مش لاجل البت السنيوره
والعيل عمال ..بيقسم !
ويقش بنات ..بالتوره
والبلى ..يهلل ويترجم
بالحبسه يضيع فُوره ..
مع لاعب عاقل ..يتحكم
ف الدنيا الفانيه ..بمهاره
ما لكل لاعب ..تفنينه ...!
فى دنيا...ورق ...كو تشينه !!
ةةةةةةةةة
الشاعر/ابراهيم القاضى
ليست هناك تعليقات:
إرسال تعليق