راجع نفسك
إزاي تأمن للي غشك
واللي باعك وب بلاش
واللي مش فارق له قلبك
يبقى مات او يبقى عاش
عاش بيكسر في القلوب
والخداع كان طبع فيه
وانت ذنب من الذنوب
تبقى لعبة بين ايديه
قوللي ليه
الحقيقة تبقى باينة
وانت مش عايز تشوفها
هو خاين هي خاينة
هي دي كانت ظروفها
فاكر إللي كان ناسيك
وانت محتاج له لوحدك
واللي مره جه عليك
واللي راح ماوقفش جنبك
راجع نفسك
افتكر كل المصاعب
اللي ياما كنت فيها
مين بجد كان مصاحب
مين مشي ماوقفش فيها
نام واصحى صحي روحك
وهمك انت إللي عايشه
مين هينزف من جروحك
اخره هيمصمص شفايفه
إللي شايفه ليك لوحدك
مين يحسه او يشوفه
انسى احلامك ووعدك
للي خوفك عكس خوفه
انت خوفت كتير عليه
هو خاف على حد غيرك
انسى أيامه ولياليه
اللي بيتستقوى بتكسيرك
انت أحلى انت اغلى
اوعى تاني تكون رخيص
واللي اتكبر و بيستعلى
جزمة وبنطلون وقميص
المشاعر للي شاعر
مش اللي يتباهى بجحوده
لو وطن اهجر وسافر
لو بشر ارفض وجوده
اعمل الايام هدوم
والبس اللي يليق بجسمك
انت شبعان مش محروم
والصبر ده طبعك واسمك
راجع نفسك
عز إللي راح يعزك
حب اللي يكون شاريك
والوجع لو جه يهزك
اوجعه انت بايديك
اصلك انت من زمان
والزمان ياما علمك
يبقى سيبك م إللي خان
واللي عمره ماستحملك
انت عايز حد شبهك
حد يعرف انت مين
حد صابر عاشها قبلك
كان بيتمناك سنين
حد عايز يبقى سترك
مش حد بالزور يفضحك
بعد احزانك وجرحك
محتاج ل ناس تفرحك
هي دي كل الرسايل
اللي مني ليك يا قلب
واللي ينكر الجمايل
لا احترم ولا حتى حب
عيش ودور ع السلام
عمر ما مكروه يمسك
واللي حبك ب الكلام
قوله شكرا حب نفسك
راجع نفسك
أحمد صبري
ليست هناك تعليقات:
إرسال تعليق