شفتوا الدنيا
فيها و فيها
مع الزجال حج هلال
..............................
شفتوا المادنة شفتوا القبة
وشفتوا الأمة لابسة الجبة
شايفة وعارفة حجم الغمة
طالعة المنبر تلقي الخطبة
قوللي بذمة شفت الهمة
شفت الكام عقال والعمة
واللي يهم هل شفت الدم
وكوم الحم وسط الزحمة
إللى يطبع يبقى مطيع
وفرصة كبيرة للتطبيع
وإللى هايرفض له هيضيع
والعربان نازلين توقيع
بسم الله ياعليم يا سميع
هو تنازل مع تركيع
أصلها تورته للتقطيع
وللا دبيحه للتوزيع
هو عشان بعضنا سكران
بيسقف. غفلان فرحان
والإعلام شغال خدام
إكدب يكدب ذيع بيذيع
لو يتكلم طفل رضيع
راح يشرح كل المواضيع
وإللى هايرفض يبقى وضيع
والتطبيع راح يبقى. بديع
واللي بهمه لبس العمة
ولبس عقال والغترة بذمة
ولا بيهمه عقد النية
ولا مصلحة والدين والأمة
شفت الأمة. رد وقوللي
ساكتين ليه وشايفين ذوللي
جوعي وعطشي بفعل عدوي
وانا بدعيلكي يارحمة اتطللي
شايفين دمي وبكاء أمي
مدوا إيديكوا واحملوا همي
واعملوا حملة ضد الظلمة
وانتوا أخويا وابويا وعمي
شفت الأمة ولا نص كلمة
ترفض فيها ظلم الظلمة
بس شطار لو ياخدوا قرار
عالفرقة في عقد القمة
شايفين غزة وفلسطين
شفتوا الناس ازاي صامدين
تحت الموت مش خايفين
في رباط حتى ليوم الدين
وغزة العزة صامدة بعزة
حتى انحرر قدس وأقصى
ونصر مبين في دنيا ودين
للإسلام للمقاومة
شفت المنظر مش تستهتر
شعب العالم كله اتظاهر
وفي بريطانيا وفي ألمانيا
ضد بني صهيون الفاجر
شفت الأزهر سبح كبر
ينصر غزة شيخه الأكبر
وشعوب عالم ضد الظالم
ألف تحية لموقف أزهر
شفنا الأمة بعمة وبجبة
وابتتهيأ تلقي الخطبة
فوق المادنة وتحت القبة
وتعلن غزة رجعت حرة
..................................
شفتوا الدنيا
فيها و فيها
مع الزجال حج هلال
ليست هناك تعليقات:
إرسال تعليق