باب جديد،،،،
باب جديد اتفتح ليا
نور الفجر رجع ينور لياليا
لسه فاكرة…
أول كلمة اتكتبت
على سطور أحلامي
حروف تضوي زي ضي
شمعة صغيرة بتنور جوايا
إحساس جميل بيتولد من تاني
بعد سنين الصمت
وكأن الزمن وقف حواليا
وأيامي كانت جبال ادامي
لا قادرة تعدي
ولا راضية تتحرك بيا
بس دلوقتي…
حسيت نسمة اتولد جوايا
نسمة ناعمة بتداعب أحلامي
وصوت بعيد بيقولي:
"قومي… اقفي… ارجعي اكتبي تاني"
رجعت أكتب من جديد
أنا مش ضعيفة
أنا إنسانة قوية
اتحديت الصمت
وضلمة لياليا
اتحديت التوهة وبكايا وأحزاني
قلت لقلبي: بالله… نرجع تاني
نعيش الحياة ونفرح بيها
رجع قلمي يرقص من تاني
على سطور أحلامي
ويكتب حروفي وكلماتي
إحساس جميل
حاسة بيه لما شفت الحياة
بتضحك وتبتسم ليا
شباك الأمل مفتوح
نسمة حلوة بتلاعب آمالي
رجعت أكتب من جديد
أشوف الفرح في عيون
اللي بيقرؤا ليا
باب جديد اتفتح
جايب الفرح لأيامي ولياليا
خلاص…
رجعت أكتب إحساسي ومشاعري من تاني
بكلام يمس القلب
ويكون ذكرى حلوة ليا
بقلم عبير جلال
الإسكندرية
ليست هناك تعليقات:
إرسال تعليق