بخاف ع الليل
واحاول احرسه بقلبي
وابات سهرانة ساعاتة
و بطٓمٍن بنجماتة
وقمرُه الصاحي متخبي
بحس بكل أناتة
وبسمع نبض آهاتة
و اطبطب له علي ضلوعة
وامد ايديا بالبسمة
واكمل بالحنان جوعة
مهو صاحبي....
بيشكي لي من الاحباب
وخوفة ع اللي بات مشتاق
وجع قلبة من العشاق
و عن مجروحة و مفارق
بعادهم طال فسد الباب
واسمع له ..
عيوني تبات تدٓمٓع له
واغضب منه وارجع تاني
اشفع له
مهوا كمان بيسمعني
بقوله ع اللي يوجعني
واحكي له عن الشوق
اللي ضيعني
واحلف له بميت حلفان
باني هبيع هوي الاحباب
فينصحني ..يرجعني
يفكرني بحاجات حلوة
يعيد الضحكة والغنوة
ده كان شاهد وسامعني
جميل الليل ومتحمل
يدوق الحزن م العاشق
ويتجمل
ويكتم كل اسراره
لا مرة في يوم نطق بيها
ولا اتكلم
وقلب الليل كبير جدااا
يشيل اوجاع حصاد اليوم
ولا يبكي ولا اتألم
ولما الناس تنادي عليه
لا عمرة سد في ودانة
ولا شفناه قليل الحيلة ومبلم
نشيل هم النهار كله....
ونستناه
ياخدنا جوا احضانة
ندور ونلف في مدارة
ونحكي له ونشكي له
يطبطب ع الوجع فينا
ويهدينا
حنان من نبع انهاره
يداوي العاشقين بالبوح
ويحضن كل زواره
جميل يا ليل
ومتحمل
لا نقدر مرة نسلا هواك
ومن صبرك
بنتعلم
و ٱه يا ليل .
صباح الخير علي الصاحيين وع النايمين وع السهران يناجي الليل 
#ميمي عبدالجليل
فجر الاثنين
ليست هناك تعليقات:
إرسال تعليق