سيبك .... بقلم ..
هلال البنا
سيبك م العايط ف الفايت
وسيبك من قولنا ومن قالت
خليك في الصابح والواضح
والناس اللي عقولهم غابت
سيبك من يوم عدى وفات
والأربع جاي بعد. تلات
أسبوع وهيفوت أسبوع
والموضوع عايش ومش مات
سيبك م الجامع ليه واقع
والمادنه كانت نور ساطع
م القرن الماضي ومين فاكر
وضحلي و فكرني يا شاطر
صعبت على صاحب البلدوزر
والحراس والناس بتغادر
سيبك ووعى تكون مهموم
ولا تزعل على شيء. مهدوم
سيبك مين رايح ولا جاش
ومين ميت ولا خدش معاش
سيبك ونصيبك هيصيبك
ناس عيشين زي. الأموات
سيبك ماتقلبش قديم
ولا تديش ودنك لحريم
كلمه وقالها جد حكيم
لو مش فاهم خليك ساكت
سيبك م العايط ف الفايت
ولا تتكلم عن شيء بايت
تعقلها وتاخد أسبابك
تسمع م اللي دقونهم شابت
ناس غيرك عابت ولا تابت
وندمانه ودموعهم سالت
ليه الصوت على ميت مات
وعمر الصوت ميرد أموات
سيبك من صوت الجرار
والسواق عبد الجبار
لكز الحيطه بالبرويطه
وفحر الفحره. بالمفحار
داك الشارع وعمل دوكه
والناس استر. يا ستار
لودر داخل فاشخ ناخر
وعبد الله محتار منهار
سيبك م الحاجه ام نجات
وبناتها والست. جملات
نازله لطيم وشق خلقات
والعايط لو رد الفايت
كام عايط على ميت مات
والميت لو عاد بالعايط
كنا بكينا. وزادنا عياط
ودموع تملى الأرض نبات
سيبك م المخنوق في السوق
واللودر داخل محموق
زي ميكون مركوب مجنون
والجنازير بتجيب من فوق
بلدوزر وحديد ومسوجر
والسواق بيبص محروق
للبياع في السوق والتاجر
والمخنوق طلع المحقوق
سيبك م الأرض اللي بتطرح
ومزروعه بتجيب. إنتاج
سيبك م الطير اللي بيسرح
والراجع. أفواج. أفواج
سيبك م الميه اللي بتطفح
وكام جركن هاتكون محتاج
سيبك م الأرض الزراعيه
وبو ورها وبلاش إزعاج
سيبك م الأرض المحتله
ولا تذكرها في أي حلات
دي أراضي فيها ناس مختله
ولا تنفعشي في مؤتمرات
هات ملوخيه وحط ف الحله
والتقليه سبع بصلات
خلي القعده على الطبليه
و الطبخه شربه وبهرات
سيبك من أفلام السيما
ولا تسمعش مسلسلات
دي أفلام باهته. وقديمه
وكان ليها عالحيطه شاشات
كانت ضحك وقلة قيمه
وفي رمضان تنزل بالزات
مش كان فيها كلمه. حكيمه
إلا أغاني ومسابقات
سيبك م العايط عالفايت
وبلاش تاكل فول النابت
سيبك من خالتي ومن خالك
وخليك مع حالتي ومع حالك
سيبك م الحامض. والبايت
وبلاش تسمع لعقول خابت
دالعفاريت والجن على بابك
والشياطين ضفات ضفات
سيبك من وقفة عرفات
والشياطين قافله الطرقات
خليها ونسهر لياليها
والأيام هانصومها طعات
سيبك من رجم العقبات
وارجم إبليس بالحسنات
سبت وحد واتنين وتلات
والأربع لو عدا وفات
سيبك م الخميس والجمعه
وابعد عن سمعه وابو لمعه
خليك في المسلوق والدمعه
ولو هاتصوم أجرك ميضيع
إعطش جوع طول الأسبوع
والأسابيع لعب وتطبيع
سيبك م اللي مش هيبيع
والمشهور ونضيف السمعه
بعد شهور هيصلي الجمعه
سيبك م العايط عالفايت
وخليك ف العايش مش مات
سيبك من قولنا ومن قالت
واجري في معاش ست عنايات
شهر. اتنين وادخل في التالت
والمشوار كله. مطبات
خليك في الواضح والراجح
والموضوع صابح مش فات
دالمصنوع لو جاي مش رايح
يبقى الميت عاش مش مات
سيبك م العايط في الفايت
واسمع صوت الست نجات
ألحان حلوه وأجمل غنوه
يا سلام على سحر الكلمات
وسيبك م اللي عدى وفات
..............
سيبك
من هلال البنا
ليست هناك تعليقات:
إرسال تعليق