(طريق ملهوش رجوع)
عصفور صغير ونفسه
يتعلم
خرج ف الكون فرحان
بيسلم
رجع والدمع ع الخد
معلم
سأله ابوه ليه
بتتألم
فضفض باللى تاعبك
اتكلم
****************
يابا ٠٠٠٠٠٠٠٠يابا
بين الشبع والجوع
طريق ملهوش رجوع
الأرض صبحت قبور
فدان عمار
ملايين بور
زمن كلاب وديابه
يابا د إحنا غلابه
وأنا مانيش مخاطر
يابا مانيش شاطر
لجل ٠٠٠الكلب يحرسنى
لجل الديب يونسنى
أنا اللى بتزقزق
عصافير بطنى
وكل محاول اعيش
يتعب النفس منى
نفسى اطلق سراحى
نفسى اداوى جراحى
والزمن بين الضلوع
طواحين
ووقفت استنى فجرى
لا مره الديك سكت
ولا يوم نطق فجرى
وتقوللى ياابنى فضفض
اتكلم
لمين هنشكى يابا
ونتظلم
*****************
آه يا قلب اتولد
لحظة سكات
لحظة بكا
ف دنيا سوده
محبكه
مجاريح بين الحبال
متشبكه
يا هل ترى؟
حبل سرى اللى انقطع
مره ييجى بالشبع
ويرد جوعى
اللى اتولد
على صدر احزانى
واعود ومن تانى
جنين بتساعنى
دنيا الأمان تانى
واعود ومن تانى
لنفس بدايتى
ومكانى
واعود ومن تانى
لنفس بدايتى
ومكانى
****************
شعر محمد على فرغلى احمد
مصر اسيوط ابوتيج نزلة باقور
معلم خبير عماره بمدرسة أبوتيج الصناعيه العسكريه بنين
ليست هناك تعليقات:
إرسال تعليق