تحنحينة العاود
(زجل مغربي)
فدفد لحمام بجناحو وطار
ملي حنحن العاود بالصوت لحنين
تفدفيدة حاملة معاني
كلها لغاز تصلح درس لينا وتلقين
تحنحينة جابت فرحة
فهم لحمام لمأصل المعنى فالحين
حرية ونزاهة كتنادي
عليها يدافع بعمرو وما يصبح سجين
العاود شريف وعناية
وصاية النبي عليه الصلى والتسليم
تحنحينة تفوج عل السامع
يتحمس بالرنة ويعود فاللحظة كريم
العاود ما يقبل تعناف
يطاوع مولاه وبالاشارة ذكي وفهيم
كيتݣال الحر بالغمزة
والعود محرر وجالب لناسو الخير
سلالة تالشان والهمة
تلقاه ناشط ملي يكون العام زين
-بقلم: محمد دومو
-مراكش/ المغرب
ليست هناك تعليقات:
إرسال تعليق