( حدث ولا حرج)
لفوها بالطول والعرض
وهاتوها م السما للأرض
إحنا ولاد الأرض الطاهرة
وأحنا حماة العرض
اول ناس فى الدنيا زرعنا
أول ناس عمرت الأرض
واثارنا شاهدة على كلامنا
والدلتا والوادى قدمنا
والإيمان شفناه بقلوبنا
قبل ما رايته تخطى دروبنا
اخناتون عرف التوحيد
لمه كان الناس في ظلام
وابو الهول بيصلى إمام
ووراه فى الصف الاهرام
بيصلوا للخالق البارى
بيصلوا للى ما بينام
عاشت حرة وهتعيش حرة
أبد الدهر ما تخضع مرة
هى فى عين أولادها القرة
وهى لتاج الدنيا الدرة
والهكسوس كانت نهايتهم
لمه فكروا فيها الحرة
قام أحمس وجماعته معاه
بشجاعته والرب حماه
هد حصون العدو وقلاعه
وطردهم ووصل لمناه
ورمسيس التانى حكاية
بطولاته دايما سبقاه
من افريقيا لأرض الشام
رايح جاي وجيشه وراه
وجنودنا بصلاح الدين
قصدوا القدس بفلسطين
هزموا أروبا شر هزيمة
ودخلوا القدس في يوم حطين
والتتار راحت أحلامهم
لمه زحفوا بجيش جرار
راح الجيش وماتت أحلامهم
وعين جالوت حافظة الأسرار
أمه أكتوبر أغلى وسام
على صدرى وصدر الأيام
خلقت كل الخلق تبطل
تقطع فينا بأى كلام
لمه أراد المصري ما رده
لا موانع ولا حتى صيام
وبارليف اتهدت هالته
والأسطورة كانت اوهام
وزراعهم الطولى اتقطعت
من صواريخ كاتيوشا وسام
وجسور وكبارى زرعناها
عبرت بينا لنصر تمام
وجنودنا فى الشرق انتشروا
من فرط شجاعة وإقدام
حالفين يخدوا بتار شهدائهم
حالفين عين العدو متنام
ليهم منا ألف تحية
ليهم منا ألف سلام
بقلمي : احمد عيسى
ليست هناك تعليقات:
إرسال تعليق