( حب غيابي ) :
عايزانا نحب كده غيابي
من غير ما نشوف كده بعضينا
دى حكاية وتعبت اعصابي
وآدينا لا رحنا ولا جينا
تكتبلي على الفيس وانا أكتِب
من غير ما اشوفها ولا تشوفني
على بعض نلف كده ونكدب
بعدين اقلشها وتقلشني
قلت لها الحب اصيل عندي
لُه جدور ووراثة ف اهالينا
لازم آخد في الحب وأدي
والكل يبارك خطاوينا
يا نشوف بعضينا ونتلاقى
نعرف بعضينا ونتقرَّب
ويصير بيننا بجد صداقة
مش ع الفيس بوك بنتهرَّب
علشان كده انا حنهيها
مش عايز قصتنا تطوِّل
الشمس ماهش طالعة عليها
والليل في حكايتك بيطوِّل
فيا بنت الناس روحي لحالك
وحروح انا برضه كده لحالي
لا طريقتي ف حبي هتحلالك
وطريقتك مش راح تحلالي
انا لازم اشوف خِلِّي بعيني
وانتظره بلهفتي على بابي
واروح له أنا وهو يجيني
معرفش احب كده غيابي
واروح له انا وهو يجيني
معرفش احب كده غيابي
بقلم الشاعر ... جمال زكي عينر
ليست هناك تعليقات:
إرسال تعليق