........أتغير...........
انا عايزك تبدأ من بكره تصبح خاين
انا عايزك تظهر ف سعادتك وتكون باين
وتوري الشاري انك جامد لو بيعاين
وانك بتوزع حنيه تملا مداين
انا عايزك تخفي احاسيسك والباقي يبان
وتخلي مشاعرك مسجونه وعليها بيبان
والناس تتفرج ع الضحكه وانتا الزعلان
م الاخر عايزك تتغير
والناس دي تشوفك تتحير
واللي يقربلك ما تعبر
وانسا حواديت الحب الكدابه
وتخلي لقلبك كام جنزير على بوابه
و عواطفك تقلبها لغابه
والطيبه اللي عليك بتبان
والعشق اللي جرحنا زمان
ورماك بدموعك ندمان
تنساهم ولا ترجع تاني
ولا ترجع م الذكره تعاني
لو حتى هتفضل وحداني
انا عايزك تتغير ليك
وتداري الدمعه دي ف عنيك
ويا قلبي بلاش حب و طيبه
الناس الايام دي غريبه
لا بتحسب حسنه ولا عيبه
ف انسا يا قلبي حكاوي جدودك
والدمعه السيله على خدودك
واعمل خط لحد حدودك
علشان تتلائم مع عصرك
وكفايه اللي نزفته ف عصرك
الناس هتوليك على قصرك
.....محمد إبراهيم درويش.......
ليست هناك تعليقات:
إرسال تعليق