ومهما الشيب كسا شعري
وتاه الحرف من شِعري
وشُفت الصحة ف النازل
ما زلت بريئة في مشاعري
...............
مازلت بعيش معاك يومك
واصب البسمة ف همومك
واغني معاك حادي بادي
واحددلك ميعاد نومك
.............
مازلت بتحبي ف ربوعي
وجزء ف أصل مجموعي
وطوبة تعلّي ف جداري
ولقمة تِسدلي ف جوعي
...............
بشوفك طفل لسه بريء
وشفطة تبل عطش الريق
بشوفك ضحكة في عبوسي
وراحة لو زماني يضيق
..................
ياابني وحتة من صلبي
يا لاعب جوه حوش قلبي
بعادك عني مش مسموح
بعادك عني شيء سلبي
................
تعالى ف روحي واتشعلق
وجودك جنبي راح يفرق
بعادك عني شيء قاسي
بيحصد ف السنين يسرق
...............
تعالى أبني معاك فكره
واعدي معاك على بكره
واعيش حارسة على حلمك
فلو تقبل اكون شاكرة
.................
انا عايزاك تكون سندي
تحاجي عليَّ ياولدي
خريف العمر جاي طاير
فراعي الباقي من وردي
................
ولو قطر الأمل خانّا
وغيّر خطه ماجالنا
لا يمكن نرفع الراية
ولا نندب على حالنا
ليست هناك تعليقات:
إرسال تعليق