الواد حماده ابن عبد المقتدر
واد مقتدر
كسيب وحالته كمان تمام
فى الكورة واد حريف خطير
وابوه مدير
مشغول وشغله عليه كتير
وفى الصلاه هو الامام
شكل الولد دايما وسيم
وعربيته من اللي هاي اوي
عايز يناسب عب قوى
معروف بأنه مليونير
راجل كبير
لكن عقله مش قوى
البت فى الموضه تمام
وكمان علام
لو وافقوا يبقى الحال تمام
ماهو برضه المال ..سلطة وقوى
ابوحماده فى شغلته
مسئول كبير
والواد بتاع بنات تقول روميو خطير
الصبح فاديه الضهر عايده
وفى المسا ماسك عبير
شعره ديك ولبسه شيك
ناقص يحط المونكير
اما ابوه لو تعرفوه
تبعد وماتصلي وراه
السبحه طول مترين يادوب
لكنه ماشي فى المعاصي والذنوب
الامضا منه شئ كبير
لكن بكام
ماشي شمال وفى الظلام
تلاقيه يغير فى الكلام
لابسين وشوش
فى الجمع يبقى إمام بشوش
بره يبقى فى توب وحوش
مايقولش حوش
وحاشيه بتلم وراه
ونروح لعمك عب قوى
تاجر تجارته من حرام
السلام عنده بكام
تاجر سلاح وينادى حى على الكفاح
فى الدوا يقول دا لقاح
والممنوعات ومكوناته
عنده دايما مستباح
عنده معارف فى الصباح
وعنده محاسيب فى المسا
شغل الاثار عنده مباح
وممكن يبيع المشتري
بكفايه يا عبد القوى
فين الرقابه لكل دول
ولا عشان
عنده حاشيه من الديول
نسيبه يمشي ملتوى
سياسته ايه حتى انتماؤه ماتعرفوش
ان كان جماعه او فلول
مره يطبل من هنا
ومره يزمر لهادول
البنت فارده شعرها سلوك حرير
واللبس موضه كيوت
وعطرها مسك وعبير
معروفه انها مليونير
عربيه اخر فخفخه
ترجع لبيتها مرنحه
م الديسكو تطلع ع البزار
مشوار صغير مايكلف الشئ الكتير
الفين تلاته يبقى عادى عندها
الفاظها شينه وكتير تزيد من عِندها
يبقى ياويله.... م اللي تشوفه جنبها
كلام من المنقى خيار
لا يهمها ان كان صغير
او حتى كان من الكبار
شفت الفلوس بتعمل ايه
كل شئ مقدور عليه
لكن الفقير نسب نلعن والديه
رغيف العيش نهار وليل
بيفكر ازاى يشتريه
جزار ما يعرف سكته
وان مر يوم واخد له صوره
يروح يذاكرها فى وحدته
ضاع الامان راح الضمير من البشر
شايفه الفلوس هاتمحي ذنب ما يغتفر
ما هي الفلوس شده النفوس
دايما تحب بعضها
واحد مدير والتاني تاجر مال وفير
يبقى العيال لازم تاخدها فى حضنها
الفقير عنده حنان والغنى قلبه حجر
زي حجاج العراق
السيف معاه لمح البصر
فرعون زمان ايه فرعنك
مالقيتش حد يلمنى
حتى الكابوس وقت المنام
ماعرفش مره يخضنى
وكل ظالم عنده يوم
الدنيا ما تفضل غيوم
حتى الطيور
تشوف حمامه تلاقي بوم
ماهي هيا دى سنه حياه
واحد فقير والتانى جنبه مال وجاه
لو فى ايمان الكل كان هاينستر
تلاقي خير والرزق نازل كالمطر
لكن ازاي؟؟؟
الحقد زاد
وماشين نوسع فى الحفر
مايهمنيش
مين يفوت او مين يموت
او مين له دين .او مين ارتد او كفر
والامثله كتير عندنا
فيه الجميل وفي من سعادته بغلبنا
وكتير بيمشي جنب حيط
الحيط ركع من حملنا
يا ناس يا عالم
احنا فين من كل دا
شاعر اديب مالوش نصيب
كتاباته بتروح فى الفضا
عايش ويمكن لبسه خيش
وقلبه مليان بالرضا
وبرضه فى شاعر لئيم
كلامه سم فى العسل
بره الرتوش تقول حكيم
ويقول الورد كان بصل
حد يفهمني إيه حصل؟؟؟؟؟
اللحم غالي عندنا
والاعلانات لحم رخيص
اعلام يعكر دمنا
والكوره واخده عقلنا
شتيمه دخلت كل بيت
فين الحياء انا استحيت
صدقنى م الاحوال بكيت
ماحد حس بدمعنا
زمان وصفونا بفلاحين
طب هو فين راح زرعنا
دلوقتى نستورد طحين
ونبور اللى فى ارضنا
عايشين حضاره مفيش كلام
والنت عشش عندنا
الزراعه فى شات وكام
وواتس يرسم فكرنا
شباب الليل ليهم النهار
ونهار اجازة ليه كدا
ارجع يا يوسف قوم بنا
بالحكمه كنت فى يوم وزير
وايمان معاك عزز بنا
زرعت قمح معاه شعير
ماشفنا قحط فى يوم هِنا
عارفين دا ليه ؟
كان فيه ايمان وخوف كبير من ربنا
العلم نور فيه الزهور
ممكن تجيب قبل الاوان
والحلم ممكن لو يبان
ومعاه ايادى تقول كمان
ماهو كل علم اساسه فكرة
والخضرة هاتغطى الغيطان
عايزين عقول ترسم لبكرا
معاه سواعد فى الميدان
ساعتها بكرا هيبقى هايندهك
ونشوف مصانع ترسها يطرب ودان
قلت الكتير ولسه عندى فى الجراب
من كان نصيرة ربنا عمره ما خاب
اللمه حلوه بين قلوب متوحده
وكل خطوه هتبقى لينا فى الحساب
اقرا وقول لى كلمتك
عايزك تبين همتك
وايا تغرك دنيتك
ساعتها هايخف العقاب
خدتك معايا طريق يا صاحبى كان طويل
الخطوه فيه بتعد توصل الف ميل
قولنا كلام من الخيال وكلام معاه الف دليل
شوف الفقير حموله زادت فوقه شيل
والحل فين ؟؟؟
الحل جوه الفكر والعزم الشديد
تلقى الليالي نورت
والخير يهل من بعيد
انا قلت عزف منفرد على ناي حزين
فى العزف .. انا سمعت الانين
بكى معاه قلبنا
لكن بكم ايوه بكم لازم نعلى مجدنا
ونقول لكل الدنيا
اه يا دنيا احنا هِنا وبكرا جي بالهنا
دى بلدنا احنا.. ترابها راسم اسمنا
ونيلها عزب فرات .. ماشي ف دمنا
دوام الحال من المحال
سنة وكتاب ربنا
يابلدى قومي وانهضى
قابلى ولادك بالامان
بيكى ومعاكى تكملي
اللي بدأناه من زمان
واضربي بإيد من حديد
على كل فاسد مننا
عايزين بلدنا لامننا
عايزين ولادنا فى حضننا
عايزين نشوف
اللي كان مهموم ضحك
والضحكه سحبت فى الوريد
انسان عنيد عدى الصعاب
والفكر صاب وبكرا جى بالف عيد
والماضي يبقى اساس معانا
والتاريخ يكتب لنا
والايد تضم الايد فى وحده مبتغانا
بس كلمة حق لازم تنكتب
الحب نعمة من الاله عشان نعيش
قولوا معانا ان العمل فيه الخلاص
وحب الاله ماينتهيش
مصر دى بلد الامان عبر الزمان
ادعوا معايا ونبتهل
بقلوب مليئه بالايمان
يحمي مصر من الفساد
ومن كل غافل او جبان
يحمى مصر جيش وشرطه
وشعبها .. سور وصد لأجنبى
آه والنبي.. صلوا عليه ونبتدى
بعزيمه ونعلي البنان
بعزيمه ونعلي البنان
تحيا مصر
...............................
''''''''''''' عوني هشام
عزف منفرد
عيش يا ابن أدم
منى العشرى
