؛؛؛ الضحكه ... بقلم ... هلال البنا ..

؛؛؛؛؛؛؛؛؛؛؛؛؛؛؛؛ :؛؛؛؛؛؛؛؛؛ الضحكه
الضحكه ليه فى زور الخلق مخنوقه
والناس حزينه وللا الفرحه مسروقه
طب ليه الكلمه جوه الحلق محروقه
مكتومه هيه ولا الخلق معيوبه
لو قلنا كلمه تطلع منا كسلانه
محبوسه فينا ولا تايهه جوانا
مش راضيه تنطق ليه قلوبنا تعبانه
وخلاص يادنيا بقيتى ماشيه مقلوبه
للفرح ناسيه وعامله الحزن سبوبه
والضحكه ماتت ولا الرخصه مسحوبه
و ليه يادنيا لسه برضو محبوبه
أيام تعدى وكل ثانيه محسوبه
فينك يابكره لسه الضحكه مطلوبه
والفرحه جايه ولا لسه مسروقه
راضيين بحكمك رب الرحمه و التوبه
ماشيين في سترك وكل ذنوبنا مكتوبه
عاصيين أوامرك ومين غيرك هايرحمنا
والأمر أمرك ستار لكل أعمالنا
لو كلمه حلوه في دار الحق مطلوبه
أو كلمه وحشه بتطلع مني زي طوبه
إنت إللي عالم حالي وأحوالي
والنيه خالصه يارب انت كاتبهالي
في يوم الآخره ممكن حسنه تنقذنى
وبالإشاره ممكن غمزه تحرقني
والدنيا ماشيه وليه علينا غداره
عملانا لعبه وللا سلعه وتجاره
وليه يا دنيا بقيتي ماشيه مقلوبه
للفرحه ناسيه وعامله الحزن سبوبه
والكلمه ليه في زور الخلق مخنوقه
لو ضحكه حلوه في حلق الخلق مزنوقه
والناس حزينه واللا الضحكه مسروقه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ الضحكه
بقلم ... هلال البنا ..

١