يعنى ايه ناشط سياسى ؟ بقلم .. طلعت عامر

يعنى ايه ناشط سياسى ؟
يعنى بياع للكلام
يعنى واحد مش تمام
بعنى ناقص فى العلام
يعنى جاى يوجع لى راسى
هو ده ناشط سياسى
يعنى شاحن للعقول
يعنى ساحب للعجول
يعنى راس على جسم غول
فى المشاكسه شئ أساسى
هو ده ناشط سياسى
يعنى هليب للفلوس
يعنى كابس ع النفوس
يعنى ع الغلبان يدوس
وش طيب قلب قاسى
هو ده ناشط سياسى
يعنى بيطلع ع الشاشات
يعنى صوتة رشاشات
يعنى موجود شير وشات
ع القهاوى يبقى راسى
هو ده ناشط سياسى
يعنى بيولع حريقه
يعنى بيظهر وقت ضيقه
يعنى معروف من نهيقه
حتى بيكسّر كراسى
هو ده ناشط سياسى
يعنى محسوب ع الظروف
يعنى بيطرطش حروف
يعنى ناقص م الكشوف
نفسه يظهر ع المقاسى
هو ده ناشط سياسى
يعنى مجهول الهويه
يعنى واحد عنده غيه
يعنى فكر بدون ماهيه
فكر بيدمر فى ناسى
هو ده ناشط سياسى

بقلم .. طلعت عامر

أعجبني

تعليقمشاركة

التعليقات

اكتب تعليقًا...