لو بتحِب كُنت فهِمت ...! بقلم .. هنادى حلاق

لو بتحِب كُنت فهِمت
إني لنظرة عينَك إرتَحت
و إن القلب ف حُبَك سَلِّم
و إني جريت عَ الباب وفتَحت
وإني بحاوِل إني أداري
لوعة قلبي و لهفة ناري
و إنك ساكِن روحي و داري
و إني لنظرة عينَك إشتقت

كُنت تحاوِل تِسمَع صُوتي
كُنت هتِرحَم ضَعفي و مُوتي
كُنت هتِفهَم معنَى سكُوتي
كُنت تجرَّب كُنت نَجَحْت
كُنت لاحِظت..
كُنت سَرَحْت..
كُنت هتِعرف إيه جُوَّايا
يمكن كانِت تِبقَى بداية
كُنت أكيد هتكُون ويَّايا
كنت بقُربَك مِنِّي سَمَحت
كُنت تفكَّر تِفهم مِنِّي
ماكُنتِش مرَّة تخيِّب ظنِّي
لو كُنت أعرَف ليه مستنِّي
أنا لَو مِنَّك كُنت بدأت
بَس الوَقت غير الوَقت
صعب أبوح و أقول دلوقت
مش راح تسمَع صوتي و همسي
بكل مافيَّا و عِزة نَفسي
أنا جاية اعلِن إنِّي رحَلت...
بقلم .. هنادى حلاق ..

٢ تعليق

١