-------
القضيه مش بنيه..ثورجيه
ولّا ولد ثورجى..
هيه شكوى منهجيه..
ياما شالها البوسطجى
وانت عايزه كل جايزه..
وانت عاجزه.. بتعرجى
هشوا حمامى وابتسامى
وكل سامى من حياتى..
صغرونى..بعترونى..
عودونى ع ..السكاتِ
فهمونى الأولانى..
يجى قبله ألف..تانى!
والأغانى يوم مماتى..
لونوها ..وتوهوها..
سلسلوها بالآهاتِِ...
شوهوا لنا..بدر ليلنا
هدوا حيلنا..كبوا زيتى
صورولنا الدنيا بمبى..
والمخبى هباب وطين..
البحر هادى للمراكبى
وادوا صاحبى حلتين..
حله فيها الحلم..ضايع
وحله فيها نص دين..
والمراكبى اكمنه..غاوى
قام يقاوى بالحنين..
قام يمد إيديه..ويسقى
بالمحبه نخلتين..
قام يفك جناح..حمامه
قام يغنى غنوتين..
غنوه تبدر ع الشراقى
جرن غله..وإبرتين..
وغنوه تنده ع التلاقى
شمس تصبح ع الجبين..
إبره ترسم ع القميص
قلب شابه وفرحتين..
وإبره تنبش ف الغطيس
عن كنيسه..بمدنتين..
فرحه تكتب ع السحابه
قوم يا بابا..شوف حسين
وفرحه تنشد ع الربابه..
لحن مرقص وإسماعين
والبنيه لم تنام..
عم بتجرى..بتجرى ليه؟
عايزه تمضى ف الدوام
ولا تبصم عند بيه..
ولا تنده ع الكلام .
الى ياما إتعشوا بيه!
يا مراكبى شد إيدى..
فك قيدى م اللى فيه
غطى جسمى.. هات لى إسمى
اللى امى بتناديه..
هات لى بر بكون ..بحضنه!
يرقى قلبى ويداديه..
ولا حد من بلدنا..
يسقى ببتنا..ويخاويه
يملا صحنى عيش ودقه..
يملا جرنى نور عينيه..
يا مراكبى البحر..عالى
واللى جالى شد حيلى
صحا يومى من قبالى..
شد بدر..يضوى ليلى
شق طاقة نور ف بكره
مهما كانت ف العلالى
بكره جايه الشمس تهتف
لما اجاوب عن سؤالى..
والبنانى تقوم وتحلف.
للبلابل بالغوالى..
يلا غنى يارقيقه..
للخليقه..باللوالى
يالا غنى للسحايب
والحبايب ف الخوالى..
خلى كف الغيط يبخر
عطر اخضر ع البيوت
ولا فاس العدل تقدر..
يوم تفسر للبنوت..
بكره فارس فوق حصان
يجى ياخدك م السكوت
جاى يرسم بكف إيدك..
عيد ميلادك بالياقوت.......
******
2011/10/20
ابراهيم القاضى
ليست هناك تعليقات:
إرسال تعليق