***..***
أنا وشيطانى..وجنانى
وبنت جيرانى ف الصوره
عصفوره تزقزق أوزانى..
أوزانى ..لوأه ومكسوره
ف الفجر تنقر ف ودانى..
وف قلبى ترقص طنوره !
تخطفنى من بين أحلامى
تودينى الشمس المهجوره
أرسمها بالشوق الحامى..
أكحلها ..كحل السنيوره
الدنيا تغنى ..قدامى ..
يا محنى ديل العصفوره
والقمره تسقف والنجمه..
ف العتمه تنور ع القوره
والفرحه تطرح كامةقمحه..
والسبحه تضلل ع البوره
شيطانى الواطى صحانى..
بقصيده هبله..ومشعوره!
شعلقنى على كتف خيالى..
وحبالى دايبه..ومقهوره
إدانى قلمى وورقاتى..
وكلماتى زى ..الفريره
ع السطر تجرجر أبياتى..
وسكاتى يجر..المقطوره!
أشقر على قبلى وبحرى..
وبحرى عايز ..زميره!
والقبلى عاوز سقاله..
وحواله تخبز له ..خميره
وبنت تربى ف لبلابه..
وكتابه..تصفر صفيره
والولد يطلع م الغابه..
والتار البايت..والغيره
البدر يزهر لياليهم..
يجمعهم..صوت التكبيره
وبدنهم يشبع فى وطنهم..
وعيالهم ..تخرج م الحيره
*****
وف بحرى الخلق كتايب
العاصى أفضل م التايب
والخيبه بتعبى زكايب..
والعيبه من غير تأشيره....
*****
فلاحنا طلق..أراضيه
طول مااحنا بنعاند فيه
الباشا ومعاه البيه..
وخلايق ف النتش خبيره...
*****
والصوره ف وش التلفاز
معجونه بهباب على جاز
والعوزه عارفه العواز.!
وحكومه ملهاش ..بزاز
ترضعنا..كله وتعميره...
*****
تسطلنا نهار مع ..ليل
وتطنش حق المساطيل
ويا ويلنا..لو شفنا دليل
يا شيطانى بطل تهويل
واديها سحلب ..وخميره...
*****
لو عشت أصف..وأعيد
وجابولى كام عمر جديد
تتبدل خلق ..ومواعيد
هتلاقوا ف الفصحه شهيد
أبو سمعه.. ولسانه العيره....!
*******
الشاعر/ابراهيم القاضى
ليست هناك تعليقات:
إرسال تعليق