جرحتك ..شعر .. إيزيس_غانم ..

جرحتك ..
ومش عارفه أطبب
جرحك المفتوح...
كأنى بسن سكينتى ..
دبحت ..
جوّه منى الروح...
فحاسبنى ..وعاتبنى ..
وخلّى صرختك سكين..
سكوتك ..موّت الفرحه..
وموّت دمى ف الشرايين..
فعود بيا ..لإبتسام روحك..
يا أجمل روح يا نور العين ..
وسامحنى ..وخلينى ..
أداوى جرحك المفتوح..

خيولى ف ملعبين عينك
خيول جامحه..
تخطّى موانع الأحزان ..
عشان تهديلك الفرحه..
خيولى ف الحروب جارحه..
صهيلها رماح ..
وبحر غضوب ..
وموج عاتى ..
لكن على بابك المجروح .
تهدّى الخطوة وتتاتى ..
فعود بيا لابتسام روحك
يا أجمل روح..
جرحتك..
بس صاب جرحك..
جوه منى الروح..
فسامحنى ..وخلينى ..
أداوى جرحك المفتوح ..
أنا عارفه انى نور عينك...
وروح قلبك..
لكن انت اللى قستنى
ف لحظة ما ابتديت عندك..
ركبت حصانك المجنون
وصابتنى سهام غضبك..
فكنت الجارح الأول ومن جرحى
فتحت ف مهجتك جرحك..!!
فسامحنى يا روح الروح
يا نور العين ..
وخدنى ف حضنك الدافى
نداوى بالدفا ...جرحين...!!
قصيدة \ جرحتك
من ديوان \ هلع الخوف
#إيزيس_غانم ..

أعجبنيعرض مزيد من التفاعلات

تعليق

مشاركة