*فاتنا كتير*
.................
لما أغمض
عيني وأفتح
ألاقي الدنيا
إتشقلب حالها
وكل عاداتنا الحلوة
بقت .. مهجورة
أعرف أنه فاتنا كتير
...
لما أشوف
الحق .. يضيع
والاخ لأخوة بيبيع
لما ... يصيب
العدل ... سكوت
وأصحابه يتمنوا الموت
يبقى حقيقي
فاتنا كتير
......
لما أشوف
ضمير .. متباع
لما أقابل ناس
من بلدي شايفة
كتير من الأوجاع
لما ألاقي بيوت
في بلدنا نايم
فيها خلق جياع
يبقى بجد فاتنا كتير
.....
لما أبص
في وشوش ناس
كانت ملامحهم
فرح وسلام
ألاقي الخوف
ساكن في عيونهم
ومغطي على كل كلام
والضحكة الصافية
في قلوبهم
بسرعة صَبحت.. أوهام
أعرف أنه فاتنا كتير
...
لما أشوف
أخ مش سائل
حتى في أخوه
لما ألاقي واحد
عاق وبينهر أبوه
لما العشرة بين
الأهل في لحظة
تضيع والمعروف
دايماً ... ينسوه
يبقى بجد فاتنا كتير
.....
لما تلاقي
إيادي ... بتبني
وإيادي تانية بتهد
لما ألاقي ناس
بتواسي في محنة
ناس ... وناس تانيه
واقفة الضد
لما يغيب
الصدق الصافي
ويبان .. الوش الجد
إعرف أنه فاتنا كتير
...
لما تلاقى
قلوب ماليانه
برحمة وخير
وقلوب تانيه
كارهه ... الدنيا
وكارهه الناس وحتى الطير
ونفوسها جواها خبيثة
حاسدة الخلق
ومش حابلهم ابداً خير
يبقى بجد فاتنا كتير
...
لما .. الظلم
صوتة .. بيعلى
والحق يصير محبوس
لما ضمائر ناس
بتموت وغيرها
يتباع.... بفلوس
لما كل شريف
في بلادي تبقى
حياته بجد كابوس
يبقا بجد فاتنا كتير
.....
كان نفسي أنهي
كلماتي بخبر سار
كان نفسي بعد كلماتي
ألاقى حبة من التغيير أحوالنا كلها تتصلح
وبصوت عالي أأقول للعالم
كسبنا ... كتير
لكن لاء زي ما إحنا
فاتنا كتير
....
قلمي
م. حمدي توفيق
ليست هناك تعليقات:
إرسال تعليق