قصيدتي غدا في أهرام الجمعه
شكرا لعندليب الصحافه
صديقي المبدع عبد الحليم غزالي
في أكتوبر
في أكتوبر ..
بييجي عم صابر يحصد الغله
على علم النغم والذكرى قام صلى
وكانت نجمتك هله.. على مسله ..
عليها اسمك الفرعوني يا أمي
سمعتك و انتي بتسمي..
على مولودك الأخضر
وزارعه الفل والعنبر
وبتنادي عليّا أرسم الوادي
سنابل من دهب فرعوني متزوق
مسير الحلم يتحقق
مسيره بعد ما زقزق..
يمام الدوح علىّ غصنك
فرح و اتهني من حسنك
وصحى ديوك أمل جداً على سطوحك
يا روح الروح أنا روحك
وانا جبالك..وانا سفوحك
وانا طموحك..
في سكة حلم مفروشه
بضله من فروع وردك
أنا طولك.. أنا عرضك
أنا شرفك.. أنا عرضك
أنا القلب اللي مش ممكن..
هاينسى مهما كان فرضك
تدفيني بشمسك مهما كانت نار..
و أتحمل رياح بردك
مياهي أعينها في سدك
يجيني قبل ما اسأل لحظة عن حالك..
حروف ردك
و أستناكي جنب البرج..
عاشق طلعتك دايماً
و انا جنبك..بكون أحسن
باحبك يا قمر جداً
ومش عايز أعيش من تاني في الغربه
يا شاربه الصبر من نيلك ..
في لحظة ما حضن بحرك
أنا هافضل أسير سحرك
وهستناكي..وافضل عمري مستني..
عشان أوصل لتِكعيبتك على مهرك
و أدفع من سنين العمر يا أمي..
ولو ترضي يكون دمي.. فلوس مهرك
*إبراهيم رضوان*
ليست هناك تعليقات:
إرسال تعليق