انا حزني شوك جوه الوريد
وقزاز في صوتي..
مع الهروب من أي شيء
مع رغبه في النوم الطويل
أنا حزني رعشة موت أكيد
ومرار في حلقي واكتئاب..
وعذاب وضيق
ومفيش سعاده بالكتير ولا بالقليل
فلتدخلي يا حبيبتي تحت الجلد
وتزيلي الآهات المتداريه في المسام
ولتسمحي ليا عشان أبدأ هروب
يمكن يكون ميت ألف عام
وبلاش تقولي فين.. وليه.. وإزاي.. وكام
بدأ الركام يدخل علي الروح الركام
ويهد فيا مرتين
مره إذا ليله نويت إني أنام
والتانيه لو بالليل صحيت علي طيف كابوس
بيدوس صوابعي بسيف لعين.. ويرجني
فبلاش في بعدي تعجني ليا رغيف..
يشبعني في ليله رجوع
مع إني مش ممكن هاعود
ليكي في يوم غير طيف دموع
إتداري مني لو هاجوع
وبلاش تحسي بضعفي لو..
شوفتيني واقف منكسر
اللي بني معايا علاقه ف يوم خسر
ده لأني مش قد النزال
والجري فوق كوم الحصي
انا مش شيطان لله عصي
ولا كنت يوم أبدا عصا..
علي ضهر قاتلين الأمل جوايا
أو قاتلين في عصفوري الرقيق
فلتغفري يا نجومي لو هارحع..
و انا معجون بضيق
انا حزني أضيق م المضيق
أوسع من الميادين في
ميت مليون مدينه ميته
والله مش قد الشتا ..
ولا قد صيفك تحت شمس الذكريات
حزني علي كل اللي فات
حزني علي كل اللي جاي
أما اللي صار موجود
فمش ممكن هاقوله لحد غيري مهما كان
يا محرماني من زمان أركب حصان
أو اقول حاجات بتخصني..
لونها بلون الشهقه يوم الإحتضار
لفيت في ميت مليون مدار
وصبحت غير قادر علي طعم الرجوع
الكل ماشي بدون ضروع
علشان كده..
مات الوليد جوايا قبل ما تولديه
خليه معاكي شويه قبل ما ترمي فيه..
في كوم حطب
اللي انتي بتحبيه خلاص قلبه انشطب
والحزن شاله وحطه داخل نار سقر
نقر الغراب في جفوني خلي الروح تموت
ومنين هاجيبلك فرع توت
أو صوت يغنيلك في ليله
لاجل ما تنامي علي الصدر النحاس
ومنين هالاقي الناس..
تفك الحبل م الصدر اللي ضاق
ماتت عصافير الشجن والإشتياق
واللي فضل.. بلبل نحيف
ميت ومتعلق بدمه
الدافي فوق سلك القفص
أنا حزني كاتم في النفس
ولا راضي حتي تطبطبي علي ضهري
مال الضهر واتهزّت
ضلوعه بالعطش والاحتياج
إزاي هاجيب التاج وانا
ماعرفشي ليكي مملكه.. ولا ضوء دليل
وماعادشي حيل يقدر يشد رحاله ليكي
ويصطفيكي عن الجميع
فبلاش نجيب سيرة الربيع
وبلاش معاكي أشتري..أو يوم إبيع
أنا لسه جوه الليل باضيّع.. تحت الرياح
أنا حزني في صدري رماح بتشكني
و انتي ولا يا حبيبتي عايزه تسكني..
جوايا لا يصيبك ملل
فاضيه القلل يا حبيبتي فوق شباكي..
والشباك سلوك شايكه
بتخنق نظرتي ليكي إذا..
جفت عروقي وكنت لسه في احتياج..
شبكه أصيد بيها السمك
اللي اتشبك في الحب.. في الشوك اتشبك
والحزن ميت مليون جبل
علي ضهري إوعي تلمسيه
أو يوم تحاولي تفرديه
وان ليله مات عصفوري
لازم تاني اسمح ليكي
تقري الفاتحه.. قبل ماتدفنيه
٢١ أكتوبر ٢٠٢٦
إبراهيم رضوان
ليست هناك تعليقات:
إرسال تعليق