كلام فى قلب كل أب
(( يابني ))
------------
يابنى
مافيش مره
إلا وكنت جنبك
*
ورايح جاي ماليش شغله
إلا إنى أسأل عليك أمك
*
وقبل ماتقول عايز
كل شيء حاضر وجاهز
على السرير يمك
*
وإن شوفت بعينك دمعه
شرايينى جوايه والعه
وشايل همك
*
ولما أحسك تعبان
أنا يابنى التعباان
خد قلبي
خد عيني
المهم سلامتك
*
وإن لقيتك يوم مكشر
أقولك يابنى بس أشر
أنا ضهرك
تحت أمرك
*
وإن شوووفتك مره مكسوف
عمري ما أشكيلك م الظروف
وأشيل عنك الخووف
وطلباتك تلقاها عندك
*
حتى لمااا كبرت
وأنا كماان كبرت.
وتعبت وعجزت
وتغيب عنى أقل وقت
أحضن صورتك
*
موش عايز منك حاجه
ولا حياتى لك محتاجه
كفاايه ملامحي
ولوني القمحي
شبهك وشكلك
*
كفايه إللي
يشوفك ويشوفني
يقوول عليك إبني
وده بيسعدنى
لأنك منى وأنا منك
*
وأنا مستور
وموش طالب
ولا ليه مطالب
غير دايما تفتكرني
دعوة الأب سامعها الرب
وإنت طيب وأنا عارفك
*
وإعمل تعمل
وإسأل تسأل
وإسمع تسمع
مافيش أيام بترجع
بس العمل الصالح بينفع
وبتاخد على فعلك أجرك
------------
ألخال عصمت البيلي
ليست هناك تعليقات:
إرسال تعليق