مجنونه ياطماطم =============الشاعر .. خالد عاطف ابوالعزم

خالد عاطف ابوالعزم

إهداء : إلى الصديق الحبيب الناقد دكتور Salah Abushady
تتساوى كلُ السلعِ .. مادامت معروضةً للبيع .
مجنونه ياطماطم

=============
مش الطماطم بس مجنونه
بقينا 100مليون ف كرتونه
متقسّمين ..
سكر ..
وشاى ..
وزيوت .
متحنّطين .. وعلينا ختم الموت
ومستلمنا المتحف المصرى
العَرض بس ف إيد وكيل حَصرى
مع احتفاظنا ب حقنا ف الرقص .
يمكن عشان بنعانى عقدة نقص
يمكن مرض صاب الجينات .. والدم
ف بقينا مابنرقصشى .. غير ف الهم
ونهز ف الوَكسه .. وف الخيبه
يتحزّموا سائر نساء طيبه
الرعب .. يبقى ف العدو زلزال
كل الشجاعه تدب ف الأندال
الكل ب يسقًَف .. يا ب يطبّل
كل اللى مش راجل .. ب يسترجل
النعجه تِغلا .. والحمار يتحَسَد
مادام شهادته تثبت إنّه أسد
والرفس .. أرحم م السنان .. والعَض
مافيش أذى .. أخرَك يادوب تتخَض
من رَفسَه فجأه ..
بس مش ح تموت .
يحيا الحمار .. لو نورث الملكوت
لو حتى تِشْتى تَلج فى بؤونه !!
مش الطماطم بس مجنونه
ولا هيّا بس وديعه ف الأقفاص
برضو العسل متعبّى ف البلّاص
والعيش .. كياس ..
والميَّه .. جوَّه الزير .
والناس .. ف وقت الإنتخاب طوابير
تشبه زفارة علبة التونه
مش الطماطم بس مجنونه
ولاهيّا بس مهاوده للبياع
وبأى سعر يحدده ب تتباع
وتتعصر .. من غير ماتتألم !!
تضغط عليها .. تحِن وتسلِّم !!
وف عِز عِز القهر .. تبقى عصير !!
يحَلّى طعم الأكل للمغاوير
وتغلِى فوق النار ب روح راضيه
وفى النهايه تاخد القاضيه
وتكون عِلب للغُرب مشحونه
مش الطماطم بس مجنونه .
_______________________
بؤونه : أحد شهور التقويم القبطى تكون فيه الحرارة فى أعلى معدلاتها
مجنونه ياطمام : نداء لبائعى الخضروات فى مصر نظراً للتقلب الحاد فى أسعارها .
خالد عاطف أبو العزم

٣