( في ذكــرى وفــــاة أمي )
كانت محجوزه .... جوه عنايه
أما القلب ...
فكان محتاج والله طفايه
كانت تضحك دايما لينا
فجأة لقينا
فرد الأمن .... نادى علينا
دخلت الحجرة
وشفت الوالدة
.... كان ملفوفه جوه ملايه
ماتت الوالده ... ورفرف قلبي
يبكى عليها
ونزل الدمع... تقول بصايه
مُتِ يا غاليه ... بس نسيتى
تجبري خاطرى وتجاوبينى
بعد رحيلك
مين هيحضر .... زى العاده
ليا عشايا
بعد رحيلك ...مين هيسرح
شعرى التايه ..... بالفلايه
بعد رحيلك ... مين يدينى
نايب لحمه
ويصبر نفسه .... بالعضمايه
فاكره يا غاليه ..يوم ما ناديتك
هاجيب لك يا مه..... ألف عبايه
يومها ضحكتى
وقلتى يا ولدى واحده كفايه
قلتى يا ولدى ... بص لحالك
وأحسن حاجة تحط فى عينك
ميت حصوايه
فاكره يا غاليه ... وعدك ليا
إنك لما أموت
تاخدى عزايا
فاكره وعدك ... لما أموت
تمشى ورايا
مت يا غاليه ... بس نسيتى
بعد رحيلك ... مين يتجرأ
ويقدر يدفن ... جسد الغاليه
فى الفسقايه .
**********
شعر / حمودة سعيد محمود
الشهير بحمودة المطيري
ليست هناك تعليقات:
إرسال تعليق