إستجواب
""""""""""""
خلعت قلبى من صدرى
وعملتله إستجواب
ودمعى ع الخدود يجرى
وعذابى ينكتب فى كتاب
لساك يا قلبى
باقى على الأحباب؟!
يتنكروا لحبى!!!!!
وشعرى فى هواهم شاب
إتنفض قلبى مابين كفى
وقال: -
أنا لسه باقى على العهد وبوفى!!
ومش هاسيب الوفا
ولو هاعيش فى عذاب
وللا حرام الوفا
على قلب بيوفى؟!
*****
بكا ودموعه دم يتقطر
بين الأنامل وعيونى بتمطر
دمع بيغلى من حرقة الآهات
على حبيب فى حبيبه ما يفكر!
غلب حنانى
رديته أنا لصدرى
غطيته بأحزانى
ورضيت أنا بقدرى
يمكن حبيبى يحن
بعد ما قلبى داب
ويرجع زمانى يمن
بعد ما قمرى غاب
وأقول للحبيب فى عتاب
لقلبك إعمل إستجواب.
*****
شعر / سيد فتح الله
ليست هناك تعليقات:
إرسال تعليق