وجع ..
قالوا القصايد نكد
والهم زاد فيها
أنا قلت أه م الأسى
اللي ماليها
مرغم وزاد الالم
ومنه بعبيها
محني يا ضهر الكلام
وورقتي حانيها
والدايره متقفله
والكلمه كانت طوق
غرقان في بحر الوجع
مادد إديا لفوق
بنادي رب البشر
من حملنا بنؤ
فين بياعين الفرح
وشح ليه ف السوق
***
البسمه غضبانه
والضحكه مرضانه
ارض النفوس
جادبه وعطشانه
وليه القلوب كلها
بالصخر مليانه
نزرع مانحصد
غير المر جوانا
***
غرقان في بحر الوجع
مادد إديا لفوق
ذليل وشفت الأمل
جوه المرار مدقوق
ملفوف عليه الوتر
واللحن مات مخنوق
والصخره عاليه
والضحكه دبلانه
ليه بس مر الوجع
داسنا ماخطانا
سيف الدناوه ارتفع
وهو اللي غطانا
شايفين نفوسنا وروسنا
جوه الرمل غطسانه
***
غرقان في بحر الوجع
مادد إديا لفوق
فيها كاس للأسى
من قسوته بندوق
دا إمتى تاني البشر
وسط العكاره تروق
وآدي روحنا ندمانه
ليه تبقى عريانه
تردد المعنى
ومنه هربانه
وإيه اللي خلانا
عومنا في أسانا
والمر اللي سوانا
للصوره ورانا
النخوه بهتانا
***
غرقان في بحر الوجع
مادد إديا لفوق
مخنوق بطعم الألم
والقلب بات محروق
جرح الكيان ما التئم
وباب الشفا مشنوق
وإزاي يعود الأمل
ومايرتميش في شقوق
والدمعه حيرانه
مؤلومه ألمانه
أيه فيك عزانه
يانفس ولهانه
غير ولعه جوانا
***
غرقان في بحر الوجع
مادد إديا لفوق
نفسي يعود حلمنا
ويبان له تاني شروق
ونلاقي تاني الفنا
قام رجع المسروق
وإن الخيار نزرعه
ونحصده برقوق
خالد موسى
ليست هناك تعليقات:
إرسال تعليق