مش فاهم حاجه ..!...للشاعر ..خالد موسي

 مش فاهم حاجه
مش قادر أسامحك
ولا قادر م الصدمه أفوق
الكدب إتلخبط في ملامحك
والصدق في عينك مشنوق
والرغبة تسيطر وكيانك
لمساوئ طبعك مزقوق
والحق اتلون بالباطل
والعمر ف قربك مسروق
***
مش قابل أتحمل ألاعيبك
والنيه دمار
مش عارف أخدك على عيبك
وأنت الغدار
مش عايز افرد ف اماني
وهيه بتنهار
مش بالع اشرب من ميه
مليانه غبار
مش ناوي ارجع من تاني
ألاقيني حمار
مش عارف احسب حساباتي
ومين الخسران
دا العايم فوق وش الميه
غير الغرقان
مين داسك دوسه وضميرك
خليه يقظان
ما يسوقه القلب اللي إتعبى
بذل الحرمان
وان كان مجروح أو فيه غصه
هتروح نسيان
دا دا بايع ضلك ومرؤتك
وانت المتهان
وإزاي هتسامح أو تصفح
والعقل إتخان
وإزاي تتهاون مع نفسك
وتعيش بأمان
وتهز في قيمتك وف ثقتك
شاكك خوان
مين باعك بيعه والغالي
يرخص لو خان
حساباتك ساذجه وغبيه
وغباء ملحوظ
مين اللي هيفضل يغفر لك
وقت اما تعوز
مين يقبل يفضل شخليله
وف ايد أراجوز
كداب واتمرغ من كدبه
في كيان مهزوز
يا ختي يا جماله اما بيكدب
ونقوله يجوز
إن الاخضر ف البني
يبقى التريكوز
يا سلام على شكلك بتمثل
إن إنت عظيم
ماسك في الحق وف زمامه
بالصدق كريم
وكمان بدموعك بتخلي
الصدق أساس
والثوره اللي بتخرج منك
علشان حساس
دا العيب يا عالم مش مني
دا العيب م الناس
وحبايبي كمان مش فاهمني
وانا زي الماس
دا انا شايل الكل ف نني
والنن احتاس
***
ما تلم ف نفسك دا الخيبه
والعيبه أساس
فيك وف كل اللي في عقله
عايش وساوس
وطاويط وبتظهر في الضلمه
ولازم تنداس
دا الحق اتلخبط في الباطل
ومفيش إحساس

خالد موسى