( مسحراتي رمضان) الحلقة الثامنة عشر.....للشاعر .. هانى نبيل الفحل

 

( مسحراتي رمضان)

الحلقة الثامنة عشر.....

كناس أنا كناس

صنايعي ف الأساس

و قلبي طيب خالص

مليان بالإحساس..

فيه حب عندي حصري

سعره و لا سعر ماس

ببص ف الميادين..

و اجمع النفايات..

عملي شرف و دين

باخد عليه حسنات

انضف الأماكن .. أزيل المهملات

و احذر اللي راكن .. ف طريق السيارات..

تلاقي قلبي ساكن.. رغم المنغصات..

عالم كبير من ورق بعمل منه حكايات..

فوانيس و طيارات..و دبابات ساعات..

و انبه اللي صاحي و اصحي ف اللي مات..

صناديق القمامة .. توابيت للملامة..

وحشتني الابتسامة .. من كل الكناسين.. مدو بالخير ايدين..

أو بلو كلمة حلوة بطعم الرياحين

أما ف يوم القيامة.. يا رب بالسلامة..

تنضف قلوب ملايين .. حنو على المسكين..

سلاحي ف المقشة.. بايت ف ضل عشة.. متعلقين بقشة

و لربنا حامدين..

كناس و زي الناس..

واصل بيه الحماس..

لسورة الإخلاص..

مكتوبة ف الكراس..

محفوظة جوة الراس..

و حروفها منورين..

.....

و رمضاااااان كريييييم