ابليس خلاص اليوم رجع ...... قلم / طلعت عامر ..

ابليس خلاص اليوم رجع
¿°¿°¿°¿°¿°¿°¿°¿°¿°¿°¿°
يا صابره لسه ع الوجع
ابليس رجع
قومى انهضى لمى الودع
أرواح كتيره بتتجمع
ابليس خلاص قال كلمته
جمع جيرانه وصحبته
ولجام حصانه خلاص فلت
انتى الوتد
قومى يا صابره اتحملى
ابكى ونوحى وكملى
بس افهمى !
ابليس خلاص اليوم رجع
دوسى يإيدك ع الوجع
واستحملى
يا شابه شاربه م العذاب
دابت وما صابها الغياب
دبحوكى حبه م الكلاب
جاتهم هباب
ليهم يا طاهره يوم حساب
جيشك وأهلك دول أسود
حالفين وراكى ع الكتاب
راح يسحبوهم لو قرود
دوسى بإيدك ع الزناد
أوعى تسيبيهم غير رماد
ملهمش دين
مسلمش منهم اى دين
جوه الكنيسه عيسى مات
فى الجمعه جامع كله مات
يا صابره ليه لازمه السكات
اليوم حداد
واللى غدر له يوم عذاب
صهيون وماسك للجام
وبإيده بيحرك لئام
نسيوا السلام
نسيوا كمان حرمة مكان
والقتل كان بعد الأذان
كان يوم هرع
والدمعه نزلت م الجدع
ابليس خلاص اليوم رجع
اااااه م الوجع
همك على مر السنين
صوتك ومخنوق بالأنين
اسمك ومحفور ف الجنين
فوق الجبين
يا صابره احنا مكملين
ويا الوجع
محسوده بولادك زمان
بحدود زمانك والمكان
صوت الجرس ويا الأدان
ياصابره عن كل اللى كان
خدعوكِ حبه م الكلاب
عضوا على جسمك نياب
زرعوا فى ارضك طير غراب
غطاه سراب
جوه الجحور ساكنين غرور
رشاش فى ايده جواز مرور
والدم غطى اليوم بحور
ابليس حضر جوه البشر
ابكى يا عين
على الامنين
جوه الكنايس والمساجد
فى الكفور أو فى الحضر
يلا انطقوا يا أهل الورع
وعوا اللى غايب واللى حاضر
م الخلايق فهموهم
ابليس خلاص اليوم رجع

¤▪《 طلعت عامر 》▪¤

أعجبني

تعليق

مشاركة