الموجة!
(زجل مغربي)
الموجة جايا تتݣلب وتلالي
جايا هايجة تتوجع وتحكي
تتلاطم مع صخور
حاملة تعبير ومعاني
درس كل بحار متمرس
كلو هم ورموز مدسوسة
يا راكب لمواج تفكر كلامي
يا ذاك السايح تذكر لمعاني
الموجة تبكي وتنوح
تحكي لمدرݣ ولمخبي
غم ساكن فلبحر الهادي
الموجة تتكلم وتبوح
المعنى فلكلام لمرصع
والساهي يبقى غادي تايه
ما لقيت من غير الموجة تشبيه
نفرغ قلبي لمألم والمجروح
كتعاني اليوم الموجة بحالي
ولا حد يسمع لكلام الساكن
موجتي هاذي ما بحال لمواج
غرايب كثيرة تشفي لعدا
نقاسي معاها ما بقى من ليام
شوف حالي وتمعن وأحكم
شوف الموجة الهايجة فلبحر
-بقلم: محمد دومو
-الصويرة/ المغرب
ليست هناك تعليقات:
إرسال تعليق