(صفحة إتقفلت)
صفحة ما بينّا خلاص إتقفلت
وف نهايتها جملة إتكتبت
يومها وافقنا وبالإجماع
إن لا حد يكلّم حد
أو يوم نرجع تاني لبعض
وإننّا نقبل بالأوضاع
صفحة إتقفلت بقى بماضيها
ليه من تاني نقلّب فيها
ولاّ نصحّي في يوم مشاعرنا
ما أحنا يوميها إحنا الأتنين
كنّا أنا وأنت متِفقين
إن خلاص بالبُعد قِبلنا
وإن الصفحة اللي قفلناها
آخر جُملة إحنا كتبناها
جملة شكر آخرها وداع
صفحة مابينّا خلاص إتقفلت
و ف نهايتها جملة إتكتبت
يومها وافقنا وبالإجماع
جايز يبقى بعادنا أسلَم
منُّه أكيد ممكن نتعلّم
نبدأ بعدُه صفحة جديدة
لَكن كل واحد في طريقُه
يختار مين في السكة رفيقُه
والتجربة راح تبقى مفيدة
مش عيب إننّا نغلط مرة
أحسن من نكابر بالمرة
وإنّ غِلطنا نقوم ونعيد
نبدأ من أول وجديد
قالوا بجد خسارة قريبة
أحسن من مكسب وبعيد
أحسن من مكسب وبعيد
بقلم .. عبدالحميد وهبه
ليست هناك تعليقات:
إرسال تعليق