أنا كل حاجة وعكسها ..!! للشاعرة .. ماجدولين ماهر

 

انا كل حاجه وعكسها..

افرح فى لحظه

وتنرسم على وشى...

علامات حزن وكركبه

أجرى واضحك والعب

احب الدنيا..

بس عاوزة اهدها..

انا أطيب ماخلق..

وساعات احس..

بالسذاجه والهبل

وانى مش قد الدنيا

وهمها...

انا بسمه ممكن ارسمها..

فوق وشوش مبهمة..

وبرده لعنه ..

يمكن تصيبك

بالعمى...

انا نور ينور للغريب

مليون طريق..

وضلمه تحاوطنى

ما نيش قدها..

انا عمر جاى وعمر فات

وكلام ...وصمت..

وحكايات...

عمرى فى يوم..

ما صدقتها

انا كل حاجه وعكسها..

ماجدولين ماهر